二人世界の勤力.....煮@17-19Mar14

今個星期好叻、由星期一煮到星期三！最開心莫過於LLB，因為晚晚都有住家飯食、晚晚都食到好飽…wakakaka^^

不過今晚唔煮喇，因為明天外遊要執行李想早d瞓，聽日要倒塔咁早出機場呀~~~

回顧下呢三晚煮過嘅餸......

二人世界の泰式青咖喱雞@17Mar14

始終最愛「藍象」，配埋早前响「數字屋」買落嘅台式蔥抓餅、只要煎番熱就OK好方便！

二人世界の兩餸一湯@18Mar14

豆腐章魚丸蛋花滾湯

鹽燒三文魚柳

香煎素鵝

呢晚主要係清一清雪櫃、全部都係之前開咗食一半同買落看門口嘅^^

二人世界の兩蒸一湯@19Mar14

茶瓜芫茜皮蛋魚片滾湯

蒸魚肉釀茄子 (10mins)

豉汁蒸排骨 (15mins)

自從有Miele之後、放工煮飯真係慳好多時間，趁兩碟一齊蒸緊嘅時候先滾湯，最後所有嘢可以一次過熱辣辣上枱開飯，真係無得頂！

蟲草花螺片花膠豬展燉湯 (附食譜)

呢個燉湯係响網上搵到嘅，原食譜無落任何肉類係c9自己加咗豬展、因為想個湯香d又唔想蟲草花個味太勁，份量亦因應自己喜好而調整咗少少，不過燉完出嚟好好飲……同LLB每人KO咗2大碗有多！

材料:

蟲草花約50g (原食譜5錢即20g)
豬展約300g (原食譜沒有)
花膠筒5隻 (原食譜用1兩花膠浸軟後需要以薑蔥出水)
去核紅棗 5 粒
乾螺片1大塊 (原食譜2兩)
陳皮 1小塊 (約1/4個)

做法:

1. 蟲草花、花膠筒、紅棗、螺片，陳皮全部浸軟洗淨
3. 豬展汆水洗淨
4. 將所有材料放入燉盅(我用咗LC 23cm Oval)、倒入4碗水，Miele燉 4 小時以鹽調味即可

 

二人世界の四餸一湯@15Mar14

難得週末賦閒在家，當然要過下煮癮，可惜眼闊肚窄.....><

蟲草花螺片花膠豬展燉湯 (4hrs)

黑椒香草烤有機雞肶

蒜蓉鹽麴炒日本椰菜

蜜餞金蠔

果皮薑絲蒸鮮鮑魚 (8mins)

節瓜炇鹽麴雞翼 (附做法)

沒有跟風做於面書群組中大熱嘅檸檬雞翼、只有應另一半下單要求而做嘅節瓜雞翼，用上c9喜愛嘅鹽麴做醃料，經調味後好好餸飯！

材料：雞翼                10隻

            節瓜                1個

             薑                   2片

醃料：鹽麴                1湯匙

調味：生抽                2湯匙

            老抽                1湯匙

            糖                    1/2茶匙

            蠔油                1湯匙

            紹酒                2茶匙

      

勾茨：粟粉                1茶匙

            水                    2湯匙

做法： 
1.  節瓜去皮切件備用；雞翼洗淨瀝乾水份，以鹽麴醃最少30分鐘 (過夜更好)。 
2.  中火燒熱油鑊下薑片炒香，下雞翼略煎至表面金黃，加入節瓜及調味拌勻，倒進適量的水(剛好蓋過雞翼)煮滾，加蓋轉小火炆30分鐘至所有材料熟透，最後勾茨上碟。

二人世界の日式壽喜燒@10Mar14

呢個星期天氣認真麻麻、時晴時陰時暖時寒，攪到LLB氣管呼吸不穩定、連自己未清得晒嘅咳都時好時壞=_=”

不過凍凍地就自然想食d可以一煲到尾暖笠笠嘅熱食、最好係一鑊熟^^

一鍋不太正宗嘅Sukiyaki......因為只依自己喜好落配料、LLB話似日式火鍋多d喎wakakaka

豬柳蛋漢堡@9Mar14

噚晚LLB有酒飯局WongC9唔洗煮飯，晚上無聊又搓包、整咗6個粟米吞拿魚沙律包同2個無餡芝麻餐包，今早LLB趁我未瞓醒已經KO咗2個粟米吞拿魚包、而c9當然係瞓到日上三竿自然醒，見2個餐包咁悶、不如煎隻星星蛋加塊豬柳上去嚟個M記老翻包……

發洩の菜肉包@5Mar14

WongC9一向是喜惡分明之士，雖則人在江湖，但自問待人處事光明磊落、是非黑白寫在臉上一目了然，不過始終明白「一樣米養百樣人」、有時依然不屑於自以為高高在上不知所謂坐响神枱狗眼看人低嘅賤精！老老實實，我唔想長命過佢囉，因為WongC9終極目標係「不務正業」向興趣發展wakakaka......

除咗溫暖窩居家有一佬外、入廚亦係WongC9發洩鬱悶嘅良方，今晚就整個快快趣趣嘅中式包，不過摺口功夫仍然有待改進......

二人世界の簡單兩餸@3Mar14

煎鹽麴梅頭豬扒‧金銀蛋上湯浸菠菜苗

真係好like鹽麴同醬油麴、醃肉只需20mins就入味，對於WongC9呢類職業煮婦嚟講真係快靚正！

 

Princess Cake House WorkshopのWatermelon Toast@2Mar14

今日同好姊妹M一齊去學近期大熱嘅「西瓜方包」，間workshop响山林道、由佐敦行過去近d唔難搵，我地揀咗11am-3pm嘅班，開頭諗住佢係overlap lunch hour、所以之前食飽先上去，但原來因為入爐前要預時間發酵，所以導師會free大家約45mins時間可以落樓行街食嘢、亦可以叫外賣，好隨意^^

上堂氣氛輕鬆、過程亦唔太復雜，出爐後切開一刻大家都好緊張自己嘅出品究竟似唔似，不過c9就好耐無徒手搓包，所以完事後對手軟晒！有朋友問係咪西瓜味……哈哈，其實只係造型、味道同一般方包無分別，不過因為綠色外皮同咗綠茶粉、所以反而有淡淡綠茶香！

總括嚟講都幾好玩、起碼學咗個造型技巧，如果將來再有呢類造型特別嘅面包班，都可再上無妨！

 

窩居のNarumi小角落@2014

剛踏入2014馬年唔夠3個月就已經兩度敗家……其實主要原因係cheap cheap WongC9想趁日本4月加消費稅之前敗晒想入嘅Narumi，所以早於過年前就搵老友們幫手order收貨、之後見到Tenso.com promote運費半價又試下自己再order，卒之d敗物到晒後就堆到好似打劫完返嚟咁、塞滿小角落之餘仲要清廚櫃！

Milano方碟同大圓碟set係「花心」朋友訂多咗以友情價出讓比WongC9嘅、實物手感靚到震！令本來只鍾情於Ferishita系列嘅WongC9都有所動搖><，不過始終蝴蝶係首選，所以都集咗對花茶杯同espresso杯，另外Noritake碟都係好友割愛醒比c9.....

後來見到Tenso運費半價，心思思下又試下自己order埋未集完嘅蝴蝶系列，因為HK價錢實在貴、c9唔捨得買……

執完兩格小角落之後，有d爆爆地喇.....

暫時要到此為止><