Day 1 (Mar
21, Thu) – 香港 -> 台北 -> 淡水
-> 美麗華摩天輪 -> 士林夜市
C9同LLB2014年度の旅今次揀咗台北、因為大家都已經好多年無去，哈哈想當年去玩嗰陣連「101」都未有，可想而知呢……>_<”
天未光就出門口，點解次次去旅行都要倒塔=_=”
7am去到機場寄咗行李就去Délifrance嘆個早餐入閘等上機
1.5hrs機程連套戲都未睇完就要落機、真係貶下眼就到，出到嚟第一件事當然係去買上網電話咭、5日任上都只係NT300，一於一人一張唔洗爭！之後坐「國光客運」1819機場巴士出台北車站……
今次請同事幫手搵agent book咗間响台北車站附近嘅酒店，交通勁方便、周圍去都唔洗左轉又轉！Check-in酒店放低行李之後就正式展開一連5天勁買喪食の旅，首先行下酒店附近街道熟習下環境、食咗第一碗牛肉麵......
之後坐捷運去淡水行街，經過台灣十蚊店「彩遊館」敗咗少少......行完街就坐返捷運去劍潭站轉免費接駁巴士到美麗華百樂園坐幸福摩天輪……無錯c9淨係想坐下摩天輪轉個圈一嚐幸福感覺，wakakaka……不過LLB話太高有d驚~_~
原車返出劍潭之後就行去士林夜市搵食……胡椒餅、蚵仔煎、墨魚卷、台南官財板，瘋薯塔
Day
2 (Mar 22, Sat) – 台北
-> 宜蘭 (金車威士忌酒廠) -> 台北
-> 饒河夜市
近年好多人愛好杯中物、c9都唔例外，現時最鍾情日本威士忌，不過仲係初學者……hehe
既然嚟到台北、就順便到宜蘭參觀下台灣好出名嘅「金車威士忌酒廠」^^
本來set咗alarm 7:30am起身、可能昨日太攰最後賴多半個鐘頭床，梳洗完落酒店餐廳食個快餐之後就行出火車站買即班台鐵去宜蘭
到達宜蘭差不多中午、响車站櫃檯劃埋返台北火車座位之後，發現miss咗班途經酒廠嘅公車、下一班要等個幾鐘，唯有响附近行下又搵嘢食下，見到牛肉麵又食番碗先……
夠鐘返番火車站出面旅遊中心門口車站等”752”公車、坐半個鐘到就到酒廠，裡面超大成間轉物館咁，行完之後仲可以試飲，最後LLB買咗支啱口味嘅single malt試下，然後見有時間過隔離Mr. Brown Coffee食個下午茶就坐返”752”出火車站、繼續附近行街^_^
經過蔬果檔見到d生果又多又平、忍唔住埋去揀下，買咗LLB至愛嘅橙同用嚟整水果茶嘅綠色桔仔^^
返到台北車站就轉捷運去饒河夜市，事後發覺自己蠢咗……應該响宜蘭出嚟嗰陣火車經過松山站就落車行去饒河、近d之餘又唔洗再搭車轉車， 家下好似坐返轉頭咁，不過有時去旅行就有呢d烏龍嘢出現(=__=)
呢個夜市超多人好逼，唔知係咪因為星期六嘅關係……酥炸章魚、蚵仔麵線、魯肉飯、吻魚仔炒飯、大過塊面嘅雞排，白苦瓜蘋果汁……超飽下又完結了一天！
Day
3 (Mar 23, Sun) – 天母
(大葉高島屋‧Sogo) -> 中山 (新光三越) -> 永康街 -> 師大夜市
今日早上本來plan咗去動物園同坐貓空，後來諗諗下都係心思思想去行百貨公司敗家、而LLB又唔想坐貓空……睇旅遊書見推介「大葉高島屋」百貨，於是改行程……
去到芝山站由於時間尚早只係10點多、先搵地方醫肚，見到好多咖啡館、不過未開>_<……咁唯有求其搵間，見呢間漢堡店有人幫襯應該穩陣、由一對上年紀夫婦經營，估計只做早午市…..雙腸漢堡都係第一次食，又幾特別^^
食飽返車站出口等免費接駁巴士去高島屋……超市區還可以，百貨區有d把鬼，無嘢啱睇唔怪之得水靜河飛(又可能啱啱開門)，如果無free shuttle我諗我唔會特登去，最後「一埸嚟到」買咗兩對筷子走人去行Sogo好過~_~
Sogo多嘢睇好多，超市係Citysuper、家品又有c9最愛嘅bone china…..Narumi, Noritake, RC, Wedgwood, 可惜even有d折咗都貴過香港好多=_=”, 實在買唔落手，好在有Afternoon Tea、價錢貴過日本少少，不過尚算合理因為香港無嘛，揀揀揀……想買個搪瓷造茶壺，點知last one有defect但sales姐姐好好人check到最近中山站新光三越counter有stock可以留貨，於是先買咗個搪瓷造食物盒之後就過去pick-up^_^
台北捷運真係方便，基本上於市內遊走都唔洗諗搭咩車，出發前問細佬借咗休悠咭(用法等於香港八達通)、只需增值就用得，另外亦非常欣賞台灣公民教育，「博愛座」真係會留比有需要人士，唔會好似「關愛座」咁比d無教養嘅人霸住！
去到三越Afternoon Tea買咗茶壺之後又周圍行下、走入附近弄巷諗住去「KONAYUKI粉雪北海道Style Café」食下午茶，點知勁多人等位又唔知要等幾耐，於是再睇其他……最後揀咗「這裡咖啡」，LLB行到好熱叫咗杯啤酒、c9就梗係要一試地道水果茶，一啖透心涼正呀^^
抖完又繼續行程、去到東門站行入永康街……又係為咗要食牛肉麵！去到「永康牛肉麵」門口好在唔太多人只係等咗一陣就有位，牛肉好淋湯底好惹味、d小碟都唔錯，好食！之後去「鼎泰豐」食小籠包同煎餃子、飽咗8成添，轉頭仲要去夜市架！
Google帶路下由永康街行去師大、唔洗坐捷運！去到夜市LLB已經完全食唔落……wakakaka、而c9都係因為貪香口買咗包鹽酥雞住行住食，不過師大夜市相比之前兩個夜市明顯少人好多、商店亦唔太多，好快行完返歸休息^^
Day
4 (Mar 24, Mon) - 信義區 (市政府站
-> 忠孝復興站)
今日行程依然係食同買、重點仲係期待已久嘅三星米芝連午餐@ L'Atelier de Joël Robuchon à Taipei！曾經响澳門同東京都去試過Joel
Robuchon嘅超正又抵食嘅set lunch，完全未曾失望過，所以plan行程嘅時候發現原來台北都有分店、梗係第一時間訂枱啦^^
嘆完超正lunch之後就行下隔離「誠品」，見到「哈肯舖│手感烘焙」有吳寶春大師嘅冠軍麵包賣，當然要買番兩個返香港品嘗！
行下行下又到下午茶時間，坐兩個站捷運去Sogo復興店9/F Wedgwood Tearoom繼續hea，呢個時候LLB已經不停响c9耳仔邊講話晏d要去食牛肉麵！好……等我嘆埋個買唔起都可以虛榮地用下嘅「骨瓷高茶」先帶你去食麵啦^^
High-tea完行去微風廣場、又入Afternoon
Tea貢下，不過忍得住無買嘢，因為好在佢d碗碗碟碟唔係bone
china，如果唔係睇怕一早已經流血不止……wakakaka，反而响廣場內書店買咗幾本關於煮食嘅書，稍後「敗物篇」再講^^
為免耳仔繼續被轟炸、都係時候開Google帶路去「林東芳」食牛肉麵，相比之下c9鍾意「永康」多d，不過LLB就鍾意呢個湯底清d喎……
非常relax嘅一日，今晚返酒店要執行李準備明天check-out返香港lu~~~
Day
5 (Mar 25, Tue) – 西門町
-> 台北 -> 香港
今日基本上係無編到任何行程、不過夜晚機走，所以點都要搵地方去打發下時間……
之前响Afternoon Tea買咗支tea spoon，點知返到酒店先發現有defect，所以第一件要做嘅就係拎返去換貨，再次嚟到中山站、趁「三越」未開門，又係搵食時間……
朋友同事們極力推介「米朗琪咖啡館」，於是同LLB去睇下有無人排隊，可幸時間尚早，唔洗等位直入^^
食飽飽換埋貨就坐捷運去西門町、因為LLB要幫同事買「老天祿」鴨舌，之後行咗一陣覺得好悶就返台北車站附近繼續hea時間同買手信，好在酒店附近有間「三越」、買完嘢仲可以去「春水堂」坐低飲杯嘢先返酒店拎行李出機場……
今次帶咗個一大一細喼、淨係麵包同蛋糕hand carry，其餘嘢pack晒入去，haha仲好鬆動、即係仲有quota買，不過都買夠，因為好多嘢香港都有，已經盡量揀d香港未見過嘅嚟買^^
5D4N台北2014早去晚返旅程就此完結，多謝各位賞面睇WongC9發咗5日嗡風…..hehe，有無興趣睇埋敗物先？想睇我先出「敗物篇」，不過相信已經有朋友响fb留意到c9連米都買一餐….wakakaka
沒有留言:
張貼留言